Rom 6 | SWP | STEP | Abo ta ene edoha? Baaea ta abididini ainauia bena i hetadada?

Romans 6

1 Abo ta ene edoha? Baaea ta abididini ainauia bena i hetadada? 2 Nige ariariri! Ita baaea eai ta mamate abo edoha eda abiabididinina? 3 Au nuatui e nige’e ita gamagarida Iesu esana eai se hebapatisoida, ia matena eai se hebapatisoida? 4 Arinai bapatiso eai, ia maeda mate eai se toretoretau‐esegaida; na doha Keriso mate eai se hetorouioi Tamana ena gigibori eai, ita hinage abo ta laulau mauri harihariuna eai.

5 Taba ena mate eai ia maeda ta heoiesegaida, ena torouio eai hinage ia maeda abo ta heoiesegaida. 6 Teina ta nuatui tauda beabeana ia maeda se hesatauroesegaida; baaea tauda bena se hetatagorigori, maraitom asubena baaea taba nige ta heayaiei. 7 Paana ia mate i hearo baaea maisana i toreyao. 8 Na ena Keriso maeda ta mate esega, hinage eda nuatu ta ’ne maeda abo ta mauri esega. 9 Paana ta nuatuiyao Keriso mate eai se hetorouioi taba nige i mateuio: ia arinai mate ena gigibori i lautomesegai. 10 Ma esega mo baaea arinai mate i matei; na Eaubada arinai mauri i mauriei. 11 Omi hinage au nuatui, baaea arinai au mateo, na Eaubada arinai au mauri eda Guiau Iesu Keriso debana eai.

12 Taumiu posaposadi eai tabu baaea i tanuagaidi, gadosisi baaeadi ata au awaabiedi. 13 Eaumiu hinage tabu au moselaedi, doha laulau‐baaea abiabina, baaea eai; na au moseuioimiu Eaubada arinai, doha aue mate wa eo au torouio, eo eaumiu hinage au moselaedio, doha laulau‐dudurai abiabina, Eaubada arinai. 14 Baaea taba nige i tanuagaimiu, paana laugagaeona nige i tanuagaimiu, ainauia mo omi i tanuagaimiu.

15 Abo edoha? Abo ta baaea paana laugagaeona nige i tanuagaida? Nige ariariri? 16 Omi abina au ata, e nige’e, ia arinai au moseuioimiu, au heayaiei, awana au abi, ia ena heaheari omi, paana ia awana au abi; e taba baaea ena heaheari, i lau mate eai, e awaabi ena heaheari, i lau laulau‐dudurai eai? Eaubada ta lautoiei omi nabada wa baaea ena heaheari eai aue lau, na lauheata se leawa ma nuaadidirimiu au awaabieiyao. 18 Baaea eai se iairihaimiu wa, abo omi au hemala laulau‐dudurai ena heaheari. 19 Emi beruberu debadi eai ea ribariba ta doha tatao edi riba: na doha eaumiu au moselaedi laulau biibiidi, eo hari laulau hari laulau baaeadi edi heaheari eai se lau; hinage doha meta huia ta eaumiu abo au moselaedi laulau‐dudurai ena heaheari eai se lau emi aba hetabuemiu ede.

20 Na omi baaea ena heaheari huiana eai wa laulau‐dudurai nige i tanuagaimiu. 21 Ginauri wa huia ta au taumaeamaeaedi, aniodi saha saha aridi eai au abidi? Meta ginauri me adi sigasiga eai ede mate. 22 Na baaea eai se iairihaimiu, eo au hemala Eaubada ena heaheari, aniomiu au abidi laulau tabuna eai, eo adi sigasiga hinage mauri nige nosina. Paana baaea maisana ede mate, na Eaubada ena ainauia ede mauri nige nosina eda Guiau Iesu Keriso debana eai.